city of zoe

Luntano luntano a stu posto ce sta nu paese scuro comm’ ‘a sprufunno a casodiavolo. Nunn’appena ca ‘o sole se ne scenne, vene ‘na notta nera, nu buio e nu silenzio ca manc ‘i muort’ su sonneno chiù brutto. Ce stanno tre fratre, uno muratore, n’ato ciavattino e n’ato cuoco, anche se ‘u terzo nun cucina mai pecché nun tene che cucinà. Nu iurno ‘u muratore se ne venette annanz’a porta do ciavattino e dicette: “fra’. fra’. iesce fora, ca t’aggia parlà”. ‘O ciavattino ascette e stette a sentì o primmo frate ca parlava ‘e ì luntano, fora do paese a cercà furtuna. “Tu te suonno”, risponnette, “fora nun ce sta furtuna, ce sta sulo ‘o scuro. E si parte e quanno scenne a notte nun truove n’atu paese, arò vaie?”
Ma nun ‘o puteva ncatenà, e se ne iettere ‘ nsieme annanz’ ‘a porta du frate cuoco; chillo comm’i verette accussì, mentre scurava, dicette: “Né, state ccà, nun ghiate giranno a st’ora ‘e notte”. E o terzo se partette pur’isso, areta ‘e primmi duie. All’intrasatto o sole se ne scenette, e ‘ncoppa a terra nun se vedeva cchiu niente. O frate muratore iette a sbatte contra a nu muro: “guagliù ferma, cca ce sta coccosa”. O frate ciavattino sentette fieto ‘e sola: “guagliù ferma, cca ce sta coccosa”. O terzo frate ca nun senteva e nu vedeva, se fermava istesso e dicette: “guagliù iammo annanza, ca ce sta coccosa, e se squagliava da paura”. E ce steve veramente na porta, l’arapettero e ascero fora. E fora ce steve nu paese ca pareva nu sogno: strade, case, puteche e pure pizzerie, e tutto o scuro se l’erano lassato areto, mentre ‘cca, pure ch’era notte, se vereva tutto bbuono, comma se fosse iuorno, pecchè ‘ncielo ce steva na palla tonna e ianca, ma accussì ianca ca pareva ‘e latte. E quanta luce faceva! ‘E tre fratre nu poco se annascunnettere, nu poco se mettettere sotta a luce che nun era cucenta comma a chella do sole. Allora ‘o primmo frate pensava: “chesta è furtuna, a tenè sta fiamma accussì bella”. ‘O secondo : “guarda nu poco tu si è giustizia, ca nuie amma sta o scuro e ntà miseria e chiste tenene stu poco ‘e pruvvidenza”. ‘O terzo nun pensava niente, ca faceva ‘o cuoco e teneva famme primm’isso. ‘O muratore costruietta na torre, auta comma a palla ianca, ‘o ciavattino facette nu sacco ‘e sola, e ce mettette ‘a palla arento, che nun se vedeva cchiù a luce, e ‘o cuoco aiutava a purtà. Zitto zitto se ne turnero a casa. Quanno ‘o sinneco i vedette e rrivà, ca purtavano stu peso e ‘o mettevano ncoppa ‘o municipio, abbiava nata tiritera: “Ué, disgraziati, nu scassata niente, fermatave mariuoli, chiammate a pollizia, chiammate l’esercito, chiammate ‘e gendarme, chiammate a San Gennaro”. E mentre chillo ieve annanza n’at’ora, i tre fratre levero ‘o sacco, e ‘na luce se spannette pell’aria comme nu lenzuolo. A ggente ca vocca araperta se ne veneva abbascio a vedè chillo miracolo eccezionale. Abbiettero a cantà e a zompà e facettero na statua pe i tre fratre, c’avettero onore e gloria.
Intanto ‘o scuro se n’era iuto all’atu paese, che c ‘aveva sulo na torre auta comm’a luna. Nu guaione ce sagliette e se truvava rimpett a porta do paradiso. San Pietro ascenne fora ‘o verette: “E tu che ce faie ccà?” Dicette, “Scinne abbascio, mariulo, ca l’eternità ancora nun te tocca”. “O sasà, ca c’hanno futtuto a luna”, dicette ‘o scugnizzo. San Pietro vedette ‘a torre, vedette ‘o sacco, e cchiù luntano vedette pura ‘a luna, ca se steva a ncaurià natu poco primma ca veneva ‘o sole. Allora vulava fino ‘o municipio ‘e chillo posto luntano, e senteva ‘o popolo ‘e cantà. “Embè, so modi questi? Nun v’abbasto ‘o sole, vulite pure ‘a luna?” ‘O sinneco dicette: “So stati i tre fratre, ‘i nun c’entro niento”. I tre fratre se facero annanza. “I’ aggio fatta ‘a torre, i’ aggio fatto ‘o sacco, e i’ l’aggio purtata”, dicettero i tre. “Sì, sì, ma perché?”, risponnette San Pietro. “Pecchè nun teneumo fatica”, dicettere i primmi duie. E o terzo, “pecché tenevo famma”. Allora San Pietro pigliava na fetta ‘e Luna e c’ha facette mangià ‘o cuoco, e chella ca rimmanette a mettette ‘ncielo, accussì auta ca nun se puteva acchiappà cchiù, e faceva luce ncoppa a tutta a Terra. E si ‘a luna ricresce è pecché ‘o cuoco s’è saziato.